雷霆負小牛瀕出局邊緣

最後5分鐘愚蠢犯錯

雷霆中鋒柏堅斯賽前透露球隊內部不和，主角正正就係兩大靈魂人物杜蘭特及韋斯布克。有指韋斯布克性格狂妄自大，因而不甘屈於杜蘭特之後做「二哥」，誓要成為球隊領袖，兩人更因此事互不瞅睬。

韋斯布克為了證明自己，今仗經常胡亂投射，當中最愚蠢必數第4節嘅最後5分鐘，事關雷霆當時已大幅領先小牛15分之多，只要雷霆肯用「拖」字訣處理攻勢，用盡24秒進攻時間，其實已可保住優勢贏波。可惜韋斯布克卻連番倉促投射，之後又多次失誤，又連番射失罰球，最終因為佢嘅愚蠢行經，而令球隊付出加時後輸波嘅沉重代價。現在雷霆總場數已落後1比3，第5回合將非勝不可。

德國槍繼續神級表現

其實除韋斯布克外，杜蘭特亦要為輸波負上責任，皆因佢雖然取得29分，但今場卻創下個人季後賽失誤新高，達9次之多。反觀小牛主將「德國槍」魯域斯基續有「神級」表現，全場20次起手入12球，全場狂飆40分。