封殺玫瑰 韋迪見紅 熱火浴血鬥牛場

熱火教練史普斯達似乎已明白到擒賊先擒王嘅道理，雖然熱火在賽事初段仍以碧比防守「有刺玫瑰」戴歷羅斯，但下半場改由韋迪及勒邦占士輪流嚴防即立竿見影，羅斯仔受制於兩巨頭下，全場起手23次僅中7球，三分球更全部「炒粉」，成為公牛輸波關鍵。另外，公牛其餘得分點布沙、鄧格及後備殺手高華亦同時啞火，整個下半場僅入29分，創下球隊今季下半場得分新低。

夏士林爆發 扳平一比一

戴歷羅斯賽後承認自己失準累街坊：「今場好多剷籃唔入，投射又唔準，明顯受制於身材較高嘅防守球員。」至於客隊勒邦占士及韋迪則大打翻身仗，「大帝」交出「雙雙」29分及10個籃板，而韋迪就貢獻24分及9個籃板，均屬今場贏波功臣，其中韋迪更在第四節一次剷籃被撞傷手肘見紅。

除此之外，差唔多抖足一整季嘅後備前鋒夏士林，今場亦成了熱火一路奇兵，上陣23分鐘攻入15分，殺公牛一個措手不及。夏士林賽後透露，自己在養傷期間一直有刻苦訓練，目的就係要裝備好自己，而教練史普斯達賽後亦表示應該一早重用夏士林。