湖人提早出局累街坊 洛杉磯唔見5.4億
近三季都能夠打入ＮＢＡ總決賽嘅湖人，今季意外地在季後賽次圈出局，除了令「湖人躉」大失所望外，就連當地老闆們都欲哭無淚，事關有經濟學家指出，湖人提早出局將連累洛杉磯經濟損失多達7,000萬美元（約5.4億港元）。
湖人遭小牛橫掃出局，最受影響莫過於當地酒吧及餐館生意，一名在湖人主場館附近開設主題餐廳嘅老闆華倫西亞透露，若然有湖人直播嘅日子，客人起碼要等兩小時先有位，但自從湖人出局後即刻拍晒烏蠅，原定舉行Game5當晚，餐廳更只得小貓三四隻。另一名在洛杉磯開酒吧嘅老闆就話，店內設置多達18部電視供客人收看湖人直播，早已預期季後賽能夠賺大錢，但如今卻要虧蝕20,000美元（約16萬港元）。
公牛闖東岸決賽鬥熱火
另方面，與湖人相關嘅產品亦隨球隊出局而滯銷，球衣、紀念品統統乏人問津，同時還封殺了當地商人財路，事關湖人在上兩季奪冠後，不少商人都趁機推出林林總總嘅冠軍系列產品賺錢，但如今卻見財化水。美國查普曼大學經濟學家艾迪比指出，所有體育大賽都能夠為當地經濟帶來衝擊，可惜最受歡迎嘅ＮＢＡ球隊湖人卻提早出局，估計會連累洛杉磯最少損失6,000至7,000萬美元收益。
賽事方面，公牛尋日憑布沙攻入全場最高23分，作客大勝鷹隊93比73，總成績以4比2淘汰對手，自98年後首度殺入東岸決賽。公牛將與熱火爭總決賽入場券，而Game1就會在香港時間周一早上上演。
本報綜合報道