最緊要有人踏出一步
「銀禧歷程」顧名思義，就係由銀禧或體院出身嘅球員組成，組織當中嘅活躍分子係九二奧運港隊隊長潘嘉明，阿潘喺東方王朝星散後退役，轉行做救護員，佢人緣佳又念舊，因此最啱牽頭搞活動。至於「七八會」比「銀禧歷程」嘅歷史更早，成立於九○年，會員全部都係七、八十年代名宿，七八會嘅活躍成員係吳炳南，佢係七十年代愉園左閘，退役後轉行做跌打，當年好多球員受傷後都會搵佢執番劑，皆因佢都做過球員，手勢都唔同啲。
無論係「銀禧歷程」定係「七八會」，都只屬聯誼性質，不過如果呢類組織再行前一步，就有條件變成球員工會，問題係幾時先有人踏出呢一步？
波男