樂壇「百變天后」Lady GaGa慣以驚人造型現身，年中嚇窒唔少歌迷，日本乒乓球壇都有個A貨GaGa，四元奈生美球技唔掂，但以靚樣及獨特形象出位，呢位童顏長青球手顛覆乒乓球界悶蛋形象，不斷以自家出品騎呢戰衣挑戰對手及球迷忍耐力，用大膽設計玩轉乒球世界，近年半隻腳踩入時裝界發展一樣掂，乒球+fashion，Work喎！
日本芸芸乒乓女將之中，以「瓷娃娃」福原愛名氣最大，論資歷，四元奈生美縱橫日本乒壇逾十年，福原愛都要叫佢一聲師姐。不過，呢位老將實力只屬有限公司，於國內比賽勉強叫做有得打吓，但於國際舞台未立寸功。雖然波唔叻，但奈生美勝在夠大膽，經常於比賽中着上誇張球衣，就算贏唔到波，仍然能夠保持極高曝光率，為傳媒製造唔少話題。
四元奈生美喜愛乒乓球，同時鍾情時裝設計，決定將兩種愛好二合為一。奈生美擅長改造卡通及歷史人物造型，成日set行頭兼戴頭飾參賽，當然唔少得着埋自家創作「重口味」作品啦，代表作首推○八年日本全國賽，當時佢身穿「聖女貞德盔甲」戰衣出戰，差啲爆冷擊敗福原愛，賽後福原愛承認被奈生美打扮嚇窒，要強迫自己唔好睇住對手個look，真陰功。
四元奈生美年紀一把，場上成績難有突破，但於時裝界發展愈來愈掂，佢之前於東京進修時裝設計，現時擁有一間設計公司，雖然其作品非常前衞，未必人人接受到，但有時裝界人士欣賞其創意及嘗試精神。
談及未來發展大計，四元奈生美仍然離唔開乒乓球：「我希望令乒乓球運動變得更活潑！」佢決心改良女性球衣，咁搞法，第時乒壇咪有好多個「A貨」GaGa？
年齡：32
血型：AB
出生地：日本東京都
身高/體重：1米5/40公斤
偶像：張怡寧
最佳成績：08年全日本混雙賽亞軍
文：溫振強