湖人5連敗現凶兆！
正處低潮嘅衞冕總冠軍湖人繼續沉淪，尋日在主場以106比120不敵雷霆，4年來初嘗5連敗！湖人在過往嘅奪冠球季，從未試過在常規賽遭逢5連敗，而且主場輸波次數亦未試過超過10場，但今季卻保唔住呢兩項數據，唔通湖人會衞冕失敗？
「紫金兵團」尋日在第四節長時間領先下，竟在最後3分鐘突然崩潰，被雷霆打出一段17比2攻勢結束賽事，最終湖人輸106比120，自07年後常規賽首次連輸5場，而主場輸波場數亦達到11場。今次5連敗可算對湖人衞冕響起重大警號，皆因湖人在16次奪冠歷史上，從未試過有一季在常規賽嘗到5連敗，而主場亦未試過輸超過10場，以如此狀態去迎接季後賽，的確令人擔心。
熱火塞爾特人打出火
今場攻入31分嘅高比拜仁，賽後就因為太躁而獨自躲在訓練房，佢解釋係因為更衣室嘅牆要重修，先到訓練房冷靜一下，其後佢狠批球隊防守差，要盡快糾正問題。
事實上，湖人在餘下常規賽都唔可以掉以輕心，皆因現時總成績與小牛同得55勝25負，再有差池隨時連西岸二哥位都冇埋。
另方面，熱火同日以100比77擊敗塞爾特人，成功進佔東岸第2位，而賽事火藥味濃厚，兩隊一度發生身體推撞。
本報綜合報道