飲大咗涉打代客泊車員 大帝媽惹官非
「大帝」勒邦占士媽媽哥莉亞近年新聞多多，日前又惹麻煩。話說「大帝媽」在邁阿密一所酒店玩樂後，懷疑飲醉酒怒打代客泊車員，結果被當地警方拘捕。「大帝」及後出席熱火操練時指事件已得到解決，並認為今次屬於私事，唔想多作交代。
根據邁阿密海灘警局透露，「大帝媽」喺當地時間周四凌晨，在邁阿密著名酒店Fontainebleau玩樂後，因代客泊車員取車太慢而大動肝火，哥莉亞先出言侮辱，及後更出手怒打代客泊車員！由於有不少人目擊事件，所以警方在清晨4時47分抵達並拘捕哥莉亞。據警方指出，當時哥莉亞充滿酒氣且眼有紅筋，擺明飲咗唔少酒，佢抵達警署後非常不合作，並覺得自己冇錯，而「大帝媽」將被控普通傷人及行為不檢，及後獲熱火一名高級行政人員保釋。
熱火助保釋 占士封嘴
事件發生後，勒邦占士亦如常抵達場館練波，「大帝」指媽媽出事時自己並不在場，因為佢啱啱比賽完畢，所以正在家中休息。不過，當記者向占士追問之際，「大帝」立即封嘴，並認為今次係私事，並冇打算向外透露，只表示事件得到好多朋友幫忙，而且已經解決，佢同媽媽現時都好好。
「大帝」隊友韋迪亦力撐兄弟，指每個人一生中總會遇到一些困擾，包括家事，就好似佢早前亦因為爭兩子撫養權而搞足兩年，所以表明會無限量支持「大帝」。
本報綜合報道