拜林加素孖住傷湖人輸波折將

湖人中鋒拜林喺第四節最後7分鐘，就冇再返回球場，據湖人軍醫表示，拜林再次觸傷膝頭舊患，為穩陣起見要畀佢多啲休息時間。至於加素則喺第三節受傷，一直帶傷上陣，但賽後發覺膝頭腫得好厲害，依家未知傷勢如何，照情況睇下場都未必出得。

紐約人再闖季後賽

積遜教練認為，湖人今場輸波係敗喺自己手上：「我哋全場有多達18次失誤，整體發揮唔好係輸波原因，不過對手今日手風好順，輸波無話可說。」但當地傳媒批評高比拜仁實在太多單打獨鬥，全場起手達27次卻僅入10球，係湖人輸波關鍵。

另一邊廂，紐約人主場以123比107擊敗騎士，兩名主將安東尼同史杜迪米亞表現活躍，而且眉來眼去合作出色，粉碎兩人不和嘅傳聞，贏埋今仗成功帶領紐約人事隔六年後再度打入季後賽。另一支勁旅熱火亦以108比94擊敗籃網，鎖定東南分區冠軍稱號。