雖然本地球圈等緊「鳳凰計劃」通過，但有啲嘢係可以「做住等」，例如波總近期宣布成立U21集訓隊，定下清晰目標，爭取衞冕2013年東亞運同踢好2014年亞運，希望喺呢兩個運動會攞獎牌。
其實港足最重要嘅三大賽係世界盃、亞洲盃同奧運，只要喺世盃入到亞洲十強賽，亞洲盃入到決賽周，又或者喺奧運入到亞洲十二強，已係好犀利嘅成就，呢啲嘢個個球迷都知，但我哋香港體育政策就唔係咁計，淨係睇你攞唔攞到獎牌，攞到獎牌就係叻，可以列入精英項目，若然你攞唔到獎牌？咁就唔該你過主嘞。
雖然東亞運同亞運足球項目較為不受列強重視，但偏偏香港政府淨係鍾意攞獎牌領功攞威，既然有啲咁嘅政策，波總為求爭取更多資源，惟有「下有對策」，一於投其所好，依家就開始準備東亞運同亞運！
睇番呢支U21嘅適齡球員，只係一支甲組後備同乙組球員嘅混合隊，球迷稍為認識嘅只有曾文輝、謝天佑、曾至孝、車潤秋同甄惠康，仲有一班踢緊乙組球隊深水埗嘅小將。
波男覺得，U21長期集訓進度始終有限，如果可以做到當年「香港08」計劃咁，直接組隊參加甲組聯賽，效果將會更好，因為港足喺09年贏得東亞運金牌，仲有去年亞運小組出線，都係咁樣練番嚟o架。