綠軍血戰贏紐約人

塞爾特人與紐約人尋日爆發「血戰」，梅菲、雷阿倫與「甜瓜」安東尼先後在賽事中被撞傷見紅，火藥味濃厚。不過勝利始終歸於塞爾特人，綠軍半場落後14分之下，有加納特挺身而出貢獻「雙雙」，助球隊以96比86逆轉成功，與同日大勝帝王嘅公牛，齊齊獲得「50勝」。

ＮＢＡ季後賽愈見逼近，間接令近期常規賽亦愈打愈激，今場戰至第二節初段已有球員掛彩，綠軍後備兵梅菲在一次籃底爭奪時被打爆鼻樑，隨即要返回更衣室止血，其後亦冇返回賽場。下半場就到隊友雷阿倫「中招」，紐約人前鋒謝菲利斯回防搶板時肘頭批爆雷阿倫眼角，後者血流如注要即時接受治療。

塞爾特人兩將見紅後，反能激發出球隊小宇宙，第四節中段先打出一段13比０反超前，紐約人在關鍵時刻有主將安東尼被朗度撞爆眼角傷出，結果讓綠軍在最後打出一段10比０攻勢結束賽事，以96比86逆轉贏波。塞爾特人兩巨頭今場表現出色，加納特交出「雙雙」24分及11個籃板，而皮雅斯則貢獻21分。

塞爾特人贏波後，取得今季第50場勝仗，至於正與綠軍爭東岸一哥寶座嘅公牛，同日則有布沙傷愈復出下，以132比92大勝帝王40分，同樣取得「50勝」。現時兩軍成績均為50勝19負，一哥位仲有排爭。另外，周日馬刺主場鄧肯勇戰傷及左足踝，有可能提前告別常規賽賽事。