湖人小牛獲季後賽資格
繼馬刺之後，西岸尋日再多兩支隊伍取得季後賽資格，上季總冠軍湖人在最後一節憑高比拜仁及費沙發威，反勝拓荒者84比80，提早鎖定季後賽席位。至於暫列西岸第三嘅小牛，亦以101比73大勝勇士，連續11季殺入季後賽。
阿堤斯惹火險釀武鬥
「紫金兵團」尋日在主場面對拓荒者，由於兩軍大有可能在今季季後賽首圈碰頭，所以火藥味頗為濃厚。湖人戰至第四節仍落後，幸好賽事剩餘2分鐘時，費沙上籃及高比仔跳投令湖人反先4分。雖然湖人隨後有「惡人」阿堤斯因肘頭批撞謝勒華萊士，被球證判罰技術犯規，兩軍更因此而險釀衝突，但湖人在最後10秒有費沙射入關鍵球再度拉開差距，最終險勝4分。
湖人贏波後，成為今季第二支「50勝」球隊，亦係球會史上第32次取得常規賽「50勝」。湖人同時鎖定季後賽席位，並連續4年獲得太平洋區冠軍。今場射入22分嘅高比拜仁賽後大讚費沙屬贏波功臣：「費沙往往能在關鍵時刻射入重要入球，係名副其實嘅大賽球員。」
另一邊廂，正與湖人爭奪西岸二哥嘅小牛，就憑魯域斯基攻入20分及史杜積高域射入5個三分波貢獻17分，以101比73大勝勇士，確定連續11季獲得季後賽資格。