今季據稱以六億人仔組軍出戰中超嘅廣州恒大，近日傳出佢哋準備推出一個全新嘅獎金制度，金額全部以人仔為單位，就係贏波五百萬，和波一百萬，但係輸波就要倒扣三百萬！但話時話輸波已經夠慘，仲要扣錢，做球員嘅真係肉赤死！
據內地報道，呢個獎金制度係恒大球會老闆嘅主意，若然輸波條數抵唔到贏波獎金，咁又點算，難道要球員「嘔突」？答案係唔使，球員可以照出波糧，不過就冇獎金咁解啫。其實呢個獎金制度引發唔少思考，因為其背後嘅意思就係：「贏波係老奉，輸波係唔應該發生嘅，所以輸波要扣錢！」球員狀態有高低，皇馬巴塞都有輸波嘅時候啦，更何況踢波仲要睇對手，又有好多客觀因素要兼顧，喺呢個獎金制度推動下，唔通恒大真係可以場場贏？
另一個爭議點係，此制度存在球會同球員對賭嘅成分，球員贏波就贏五百萬，輸波就輸三百萬，或者可能呢啲係「賭波基因」嘅殘留，既然大家唔賭唔舒服，索性由球會同球員直接對賭，輸同贏閂埋門自己搞掂，唔會影響其他人！
恒大呢個獎金制度雖然幾新鮮，但都未算前所未有，例如今年初就有人提議過，出年嘅省港盃不如由港粵雙方賽前各出廿五萬，贏波嘅一方擸走五十萬，冇假波冇黑哨，真金白銀贏面子又贏錢，如果成事，下屆省港盃認真令人期待！