年僅22歲嘅白人前鋒路夫，今季在各項數據都有所增長，平均得分20.3分、籃板數字更去到15.4個，現時排在榜首，大有機會首度奪得籃板王美譽。路夫身高不及「魔獸」杜域侯活，彈跳力亦不如昔日籃板王洛文，但路夫最強之處就係勤力，搶籃板永遠孭足位冇話偷懶，防守時亦走動多絕不欺場，所以每次睇木狼比賽，路夫嘅落力都會令阿裕大為感動。
「藍領球員」球隊根源
其實路夫呢類「藍領球員」，一直都備受球迷忽視，佢哋永遠都唔及一些擅於進攻嘅球星受歡迎，想攞MVP更加係妙想天開。不過一支成功嘅球隊，永遠都需要呢類「藍領球員」為球星開山劈石，佢哋先係阿裕心目中嘅英雄。