比利時光倒流30年

紐約宇宙不老大使

比利一生只効力過兩間球會，就係巴西勁旅山度士同埋紐約宇宙。紐約宇宙於七十年代曾擁有光輝歷史，但隨着比利掛靴及球會入場人數下降，八五年宣布倒閉，直至現任班主兼前熱刺副主席金善利去年重組，邀請比利出任榮譽會長、簡東拿任總監，紐約宇宙正式捲土重來，球會計劃兩年後加入美職。

比利一見到記者，就話好懷念香港：「我曾經代表山度士同紐約宇宙嚟香港比賽，屈指一算已經係三十幾年前，香港令我留下好多美好回憶。雖然行程緊密，我個樣有啲疲倦，但我好興奮，因為今次係肩負起重建紐約宇宙嘅使命。」

講起幾十年來球壇變化，比利感觸良多：「時代唔同咯，我踢波嗰個年代冇咁多贊助，又冇咁多電視轉播，依家球員一年搵嘅錢等於我當時十年，依家球圈風氣亦唔多好，好多球會經理人為咗賺錢，將球員任意擺布，根本唔係為佢哋好，計我話，踢波唔係淨係為賺錢嘅。」

棟篤笑反科技執法

比利亦唔太贊成引入科技執法：「足球唔同網球或F1賽車，係由好多人一齊參與，引用科技執法有好多技術性問題，亦未必準確。」比利講到興起，即場示範科技執法面對嘅種種困難，認真鬼馬。

至於如何提升中國足球水平，比利就話最緊要係打入世界盃：「中國必須參與更多大賽，如果中國能再次打入世界盃嘅話，喺當地一定會更受重視，帶動整體足球水準。」

比利將於今日中午出席美國商會午宴，並會於下午到港會與青少年足球員交流。