國際奧委會主席羅格早前表示，全球非法體育博彩猖獗，保守估計每年收入達一千四百億美元（約一萬零八百億港元）。香港情況亦非常嚴重，據馬會行政總裁應家柏透露，港府庫房每年因非法博彩而損失約二十六億港元稅收，大家唔好忘記，呢啲錢我哋都有份，如果唔係政府邊有錢派畀我哋，點可以坐視不理！
應家柏表示，全球互聯網博彩上季增長逾十個百分點，但馬會上季收益卻僅增長百分之三，啲錢去咗邊？相信心水清嘅朋友都知道啲錢係去咗外圍非法莊家度。香港○三年通過賭波規範化，主要目的就係打擊非法及外圍莊家，與其益咗啲不法人士，倒不如畀馬會賺，啲錢可以攞嚟做善事回饋社會。
點解啲人寧願賭外圍都唔幫襯馬會？老實講，相比起其他地下莊家，馬會競爭力真係唔夠，唔計人哋可以用信用卡找數，甚至賭「白頭片」，淨係投注項目同受注聯賽，已經係馬會嘅幾十倍。
好似依家網上直播大行其道，好多外圍博彩公司都提供呢個服務，只要你開戶就可以網上睇波，除咗南美自由盃、亞冠盃呢啲「大賽」外，連波蘭、印尼等三、四線聯賽都有得睇，仲可以一路睇波一路賭走地添！
其實又唔怪得馬會，每次馬會想搞新意思，總有啲衞道之士喺度阻頭阻勢，又話鼓吹賭風、增加社會問題等，咁我又想問，英國有過百間註冊博彩公司，投注站通街都係，咁英國又係咪有好多社會問題呢？與其畏首畏尾益晒啲不法人士，點解馬會唔進取啲，搶番啲生意返嚟？波男就唔信喺國際享負盛名嘅香港馬會會輸囉！
波男