「朗拿度早就應該退休啦！」
見到「球王」比利，梗係要問吓佢對朗拿度退役睇法，比利話雖然兩人効力嘅球會係世仇，但佢對於球圈失去朗拿度呢啲咁優秀嘅人才都感到好可惜，不過比利話如果係佢嘅話，就會選擇喺兩、三年前引退，而唔係好似依家咁輸波走人！
回想自己退休唔好受
朗拿度退休前効力嘅哥連泰斯，於今年南美自由盃出局，據稱朗拿度掛靴導火線，就係畀班球迷逼走，比利話朗拿度其實應該早啲退休：「朗拿度經歷過兩次嚴重傷患，近幾年已踢唔番最高水平，我覺得佢應該喺職業生涯最高峰時期掛靴，等球迷可以留低美好回憶。」
比利承認退休初期感覺唔好受：「我好了解佢嘅心情，係需要一啲時間適應，喺啱啱退休時候一定仲好想踢波，呢種感覺一啲都唔好受。」