今年ＮＢＡ轉會窗特別熱鬧，由常規賽開賽至今，涉及轉會球員多達六十八人，當中有唔少重磅轉會，好似安東尼、柏堅斯、迪倫威廉士同巴朗戴維斯轉投新東家都非常矚目，成為球迷茶餘飯後嘅話題。
講到球員交易，ＮＢＡ呢種「以物易物」嘅轉會方式，一向係佢哋嘅特點，連歐洲足球界都有人話要效法，引入薪金上限制度，但波男認為，呢種制度有辣有唔辣，好處當然係製造一個健康嘅財政環境，畀球會經營，壞處係當球員係貨品，好多時球員畀人Trade走咗都懵然不知，欠缺人情味。
好似塞爾特人中鋒柏堅斯被送到雷霆，好多「綠軍」球員都好傷感，皮雅斯直頭話，感覺好似失去咗一位家人。柏堅斯唔算頂級球員，卻係更衣室內嘅一位好夥伴，性格樂觀正面，深得隊友歡心，有時球員除咗喺數據上反映能力，好多潛在嘅貢獻，都唔應該被忽視。
ＮＢＡ重新洗牌後，最終鹿死誰手真係冇人知，驟眼睇來，馬刺、湖人、塞爾特人同熱火固然係熱門，但小牛、雷霆、魔術、公牛甚至紐約人都有力阻礙大局，自從「波神」米高佐敦退役後，ＮＢＡ熱潮明顯減退，但隨着明星賽收視創八年新高，轉會市場又炒得咁熱，ＮＢＡ似乎有復甦迹象！
波男