今季ＮＢＡ多單「重磅交易」，都係球星從西岸「遷居」東岸，一下子令東岸星光熠熠。有見及此，不少西岸球隊在交易截止日前都積極擴軍，其中火箭就盡地一煲，送走兩大主力柏堤亞及布魯克斯，希望大換血力爭季後賽入場券。
由於姚明再度因傷提早收咧，一直希望加強中鋒力量嘅火箭，就從灰熊換得7呎3吋高嘅上季新秀榜眼泰亞拔及一個選秀權，但就送走柏堤亞。泰亞拔在09年選秀會上，僅次於比力克格芬而被灰熊選中，可惜表現一直未達標，上季長時間被灰熊放落發展聯盟，慘被嘲諷為「水貨榜眼」。此外，火箭亦將唔多聽話嘅布魯克斯送到鳳凰城，換入「拿殊二世」達基斯。
除火箭外，另一支力爭季後賽入場券嘅西岸部隊拓荒者，就換得「貓王」謝勒華萊士，而中鋒比沙比拉就被送往山貓。至於今季因比力克格芬而人氣勁升嘅快艇，就挖走「大帝」勒邦占士昔日好拍檔、騎士控衞莫威廉士，巴朗戴維斯就同佢互換東家。
本報綜合報道
