高比開懷禪師收貨

在明星賽前遭逢3連敗嘅上季總冠軍湖人，經過明星賽期小休，尋日表現簡直猶如猛虎出柙！湖人單在首節已經領先作客嘅鷹隊13分，第二節進一步擴大優勢，完上半場已拉開距離至21分。鷹隊下半場未見有何起色，令賽事提早踏入垃圾時間，湖人最終以104比80大勝，結束3連敗頹勢。

成卡通網絡名人「球場之王」

由於賽前已連輸3場，湖人眾將今場都不敢怠慢，多達5位球員攻入雙位數字得分，其中高比拜仁僅上陣26分鐘已射入全場最高20分，而加素亦獲得「雙雙」14分及10個籃板。高比仔賽後就大讚球隊打番出應有水準，並認為湖人今場嘅防守表現無懈可擊。至於教練「禪師」積遜就話終止連敗係一個好開始，但常規賽嘅路途仍然非常漫長。

另方面，高比仔日前出席咗首屆卡通網絡名人獎頒獎禮，並獲得一項名為「球場之王」嘅最佳男運動員獎，表揚佢為體育界作出貢獻，而今次頒獎畀高比仔嘅嘉賓，就係網球好手「大威」V威廉絲。