火箭決將姚明當交易籌碼
NBA交易截止日愈見逼近，一眾球隊都加快步伐，希望換得良將加強實力，其中失落「甜瓜」安東尼嘅火箭，就盛傳四出兜售6名戰將，包括「小巨人」姚明在內。
安東尼着紐約人7號
據多個美國傳媒報道，火箭失落安東尼後，現已另覓目標，並決定以6名球員作籌碼，分別係布丁格、哥特尼李爾、泰倫斯威廉士、謝菲利斯、佐敦希爾及姚明。雖然「小巨人」已經因傷提早收咧，但佢仍具有一定吸引力，皆因其合約將於季後屆滿，所以獲得姚明嘅話，球隊就能在季後騰出薪酬空間。據悉，火箭現時最想得到嘅球員，就係仍未同金塊續約嘅中鋒連尼。
至於轉會紅人「甜瓜」安東尼日前已經與太太飛往紐約，佢同囝囝「小甜瓜」仲一齊戴上紐約人隊帽落機添。由於紐約人15號球衣已經退役，所以安東尼亦宣布下半季會穿上紐約人7號戰衣比賽，並非早前傳聞嘅30號或13號。