本地波鳳凰計劃建議兩年後成立「港超聯」，內容其中一點係硬性規定職業球會一定要成立青年梯隊，冇梯隊就唔准搞波！究竟咁做係咪適合香港，波男唔敢講，但我哋不妨比較吓歐洲列強嘅青訓現狀，或可從中搵到最佳方案。
足總聘用嘅改革顧問來自英國，呢班顧問當然最熟悉英國嘅青訓制度，英超聯作為世界最受歡迎聯賽，各隊都有大量資源撥作青訓，而第二至第四級別共七十二隊，每年每隊都獲足總十八萬鎊（約二百二十萬港元）青訓補助金，淨係呢樣，香港都做唔到。
西班牙同荷蘭都重視青訓，呢兩個國家嘅青訓制度又係點？原來兩國足總同政府都冇青訓補助，青訓係球會自發行為，但巴塞隆拿同阿積士卻擁有全歐洲甚至全世界最成功嘅青訓系統。
至於俄羅斯、德國同意大利嘅青訓亦各有特色，俄國由於取得2018世盃主辦權，又有車仔班主阿布斥巨資成立國家足球學院，加上政府投入，俄國嘅青訓基本上係由政府同有錢佬主持。
意大利方面，青訓搞得最好嘅球會其實只有祖雲達斯、米蘭雙雄同羅馬，不過意大利足總亦設有青訓部門，招攬人才。
德國嘅青訓制度就近似醞釀中嘅「港超聯」，德國足總要求所有職業球會設置青訓中心，否則不獲發牌，不過足總本身亦設有球探網絡，雙管齊下培訓新秀。
波男