肯塔基孖寶新秀賽玩晒
【本報綜合報道】約翰禾爾與古辛斯尋日自大學後再成隊友，故劍重逢自然得心應手，兩人連番合作做出精彩入樽鏡頭之餘，仲協助新秀隊以148比140擊敗二年級隊，成功衞冕！「狀元爺」約翰禾爾破紀錄地交出22次助攻，力壓隊友古辛斯獲得MVP寶座。
禾爾22助攻膺MVP
今屆新秀隊除擁有「雙狀元」坐鎮之外，亦有三人來自同一間大學肯塔基，分別係約翰禾爾、古辛斯及比素爾，夾咗咁多年，默契自然非常合拍，三人不斷為球迷帶來精彩入樽鏡頭。其中古辛斯成為今場「得分王」，攻入33分及搶得14個籃板，不過依然未能獲選為賽事MVP，皆因隊友約翰禾爾全場攻入12分及交出22次助攻，打破基斯保羅在07年新秀賽所創出嘅17次助攻紀錄，成為歷年最高。
「人氣王」比力克格芬今場只係短短上陣十三多分鐘，係今屆新秀賽上陣時間最少嘅球員，但已有14分進帳。新秀隊教練保丹賀沙指出，由於格芬連續三日都有比賽，所以需要較多時間休息，但入場球迷就顯然對此舉非常不滿，不斷呼喊「We Want Blake」，希望格芬能夠再返球場比賽。想睇比力克格芬入樽嘅球迷仲有機會，因為佢今日將會參與周末派對嘅入樽賽。（now 635周日早上9時30分直播明星賽周末派對）