熱火痛殲溜馬

欖球式長傳技驚四座

上仗對波士頓嚴重失準嘅韋迪，今場可謂打出今季代表作，開賽後迅速入局，手感極佳下首節已攻入22分，寫下今季個人單節得分新高。此外韋迪在首節尾段一次搶下籃板球後，大力欖球式長傳交給隊友勒邦占士，後者起跳後接球上籃，一氣呵成令人拍案叫絕。

完上半場後，韋迪已經收穫31分，平了球隊史上半場得分最高紀錄，之前紀錄為杜格拉斯在1990年12月所創。其實溜馬今場表現亦唔算差，第3節更一度反超先對手，可惜第4節又成為熱火天下，最終熱火贏110比103，取得常規賽第40場勝利。

3巨頭交足貨轟90分

大演個人騷嘅韋迪今場轟入41分及搶得12個籃板，另外兩巨頭勒邦占士及保殊亦交足貨，「大帝」貢獻27分，而保殊則有22分進帳，3巨頭合共轟入90分之多！

熱火贏波後今朝會作客速龍，完成後就會結束連續4場作客之旅。

本報綜合報道