本地波所謂鳳凰計劃，成份報告百幾頁紙三十幾個重點，其實最後可歸納為一個「錢」字！講到發展足運，卡塔爾嗰邊就有個終極豪華版鳳凰計劃，搞到連世盃主辦權都畀佢擸埋，令人嘆為觀止。
卡塔爾政府實在富貴，又唔知點解佢哋特別鍾意搞足球，除咗成功申辦世盃，卡塔爾基金會近期又破天荒買斷巴塞隆拿嘅心口廣告，跟住仲有傳該國皇室有意收購曼聯，卡塔爾人嘅影響力已延伸向國際球壇。
香港足運擁有自己嘅文化同傳統，當然毋須同卡塔爾嘅金錢足球比較，但大家嘅發展方向其實大致相同，卡塔爾現時正在實行嘅，香港都可以做，只係大有大搞，細有細搞啫。
卡塔爾近年大力發展國內聯賽，重金羅致多位過氣球星前往掘金，羅馬里奧、巴迪斯圖達收山後都去過搵食，呢種手法當年日本職業聯賽發展初期都做過，亦證明好有效，港甲兩年後要升級為「超聯」，就要準備銀彈請球星。
卡塔爾近年高調吸納歸化球員入代表隊，最著名係搵到巴西前鋒艾列頓入籍，不過最終被國際足聯制止，吸納歸化球員方面，港隊其實一直有做，高尼路同卓卓就代表過港隊，不過要做得成功，講到尾都係要視乎外援質素，如果搵班「托布」外援入港隊，不如用番土炮仲好過啦！