史杜迪米亞發揮小宇宙 紐約人生擒巫師
邊個會係今屆NBA常規賽MVP？呢個問題目前仍言之尚早，但如果你問紐約人球迷嘅話，佢哋一定會答係史杜迪米亞。昨日紐約人主場對巫師，史杜迪米亞繼續有光芒四射嘅演出，帶領球隊主場以115比106擊敗巫師，令麥迪遜公園球場嘅球迷不斷呼喊MVP！
獨取30分拒談安東尼
今季以近億美元同紐約人簽咗5年合約嘅史杜迪米亞，季初一直喺MVP排行榜排喺前列位置，直至上周表現較為失色，先畀公牛嘅戴歷羅斯搶走第1位，結果佢昨日即刻發力，個人獨取30分、9個籃板球同5次助攻，成為紐約人贏波嘅功臣，令主場內高呼MVP嘅聲音不絕於耳。
史杜迪米亞賽後笑言今場成功發揮「小宇宙」：「我感覺自己嘅能量喺今場釋放出來，我哋防守打得好好，係今場贏波關鍵。」當記者問及金塊主將安東尼來投嘅傳聞，史杜迪米亞立即三緘其口，話待正式公布先再發表意見。
阿聯投閒置散冇運行
輸波嘅巫師就認真慘，佢哋今季作客21連敗，真係輸到「樽鹽」都冇埋，至於中國球迷最關心嘅易建聯則繼續被投閒置散，後備上陣僅80秒，各項數據都係「零雞蛋」，搞到佢要掟毛巾洩憤。唉！阿聯，繼續係咁都唔係辦法，不如都係走吧啦！
本報綜合報道