大帝復出照樣死火
都係韋迪生日累事，熱火群星幫佢慶祝完之後，即刻個個腳仔軟，尋日傷愈復出嘅「大帝」勒邦占士命中率奇低，30射僅11中，而出名穩定嘅韋迪亦頻頻失誤，保殊更因傷冇落場，「三巨頭」冇一個掂，結果熱火加時以89比93不敵作客嘅鷹隊，連輸四場。
鷹隊贏波 熱火四連敗
「大帝」腳踝受傷抖咗兩場後，尋日終於復出，不過表現令人失望，雖然攞咗34分，但起手達30次，射失咗19球。喺占士8年職業生涯之中，只係試過一次起手30球而命中不超過11球，但嗰次占士冇失誤，今仗卻有6次，所以話今場係占士職業生涯最差一場並不為過。
至於一向表現穩定嘅「閃電俠」韋迪，尋日亦失準，比賽初段帶波甩手甩腳，全場出現6次失誤，防守亦頗多漏洞，睇嚟班球員個心已經玩到「闖」晒，要時間慢慢平復。
熱火不敵鷹隊後今季首次四連敗，教練史普斯達對球隊表現感到相當不滿：「輸波關鍵係我哋保唔到領先優勢，而且球員之間嘅信任不足，導致好多時都係單打獨鬥，全無默契可言。」熱火打完今場波後有幾日時間休息，然後於周日喺主場迎戰弱隊速龍，相信到時會大打翻身仗！