中國隊喺今屆亞洲盃分組賽畢業，已經連續兩屆出唔到線。國足成績曳，以往肯定畀人鬧到暈，但今次出局，責罵聲音唔算多，反而仲有人讚佢哋踢得好，莫非中國粉絲們輸到傻咗？
球迷當然唔係傻嘅，中國隊真係好咗。為改善國足積弱問題，中國足協認為係國內假波橫行所致，故近年大力掃黑打假，拉咗唔少「大老虎」，令球員有所警惕，喺球場上唔好搞咁多無謂嘢，不計勝負，只求落力演出。
今屆亞洲盃中國隊以四分出局，睇得出球員已經盡晒力，因此即使分組賽出局，仍然贏得部分球迷讚賞，不滿聲音係少不免，但都係分析球隊弱點所在，希望未來有所改進。
其實現時嘅中國足球仲差一樣嘢，就係要糾正心態，輸波就係輸波，技不如人，唔好再賴人哋出術、球證偏幫等被害妄想症上腦。自從早前亞洲足協選舉，東亞三強中日韓全軍覆沒，變成西亞同南亞代表攞晒話事權之後，中國就要預咗畀人屈，就算畀人夾計踢出局，都係冇得出聲。
睇睇日本同南韓，佢哋同樣競選失利，但都唔緊要，因為日韓實力夠強，話知你西亞各國點樣耍手段，最後出線踢世盃仍然係佢哋。以中國足球嘅雄厚資源，現時最需要係培訓人才，眼看日韓不斷有新人湧現，香川真司、具滋哲上位，中國亦要加快步伐，自強不息先至有出路。