熱火借勢升東岸一哥

七球員得分雙位數

未知火箭今季係咪未有拜神，繼姚明重創後，另一主將奇雲馬田日前亦告受傷，所以教練阿杜文今場迫於無奈排出一個雙控衞陣式，由布魯克斯拍路維，而6呎10吋嘅佐敦希爾則繼續頂替中鋒位置，全因連後備中鋒畢米拿都缺陣。但勢估唔到天殘地缺嘅火箭竟打出代表作，今場多達7位球員得分達雙位數字，其中布魯克斯3分球8次起手中5球，攻入最高24分，協助火箭爆冷贏波。

塞爾特人今場亦非「夫添」，加納特因傷休戰，但今場致命傷係「綠軍」手風欠順，全場投射命中率只有50.7%，令塞爾特人遭受2連敗。教練李華士賽後大鬧球隊心態輕率，並表明今季形勢唔同，若然在季後賽失去主場優勢，就好難奪得冠軍，似乎李華士的確甚忌冒起嘅熱火「三巨頭」。

甜瓜投「籃」未傾掂

另方面，金塊昨日向籃網作出警告，表示必須要將安東尼轉會消息保密，若然再爆料畀傳媒知嘅話，就會將「甜瓜」送到紐約人。金塊認為籃網與安東尼經理人在日前涉嫌透露兩軍轉會消息，以促使交易達成，但其實兩軍條件仍未傾妥，導致金塊不滿。

本報綜合報道