【本報綜合報道】要數2010年出位人物，巴拉圭「手機乳神」拿莉莎可佔一席位，佢喺南非世界盃看台上演一招「胸夾手機」一炮而紅，2010年快將結束，拿莉莎坦言今年係重要嘅一年，仲話自己全年都咁High，更視自己嘅胸脯為朋友。
拿莉莎回顧今年發生嘅事情，佢講得好露骨：「我覺得自己全年都處於性興奮狀態，因為我夢想嘅生活變成現實，全世界嘅人都鍾意我。」
環繞拿莉莎身邊話題不絕，佢亦不忘製造話題，曾向西班牙門將卡斯拿斯嘅女友提出，希望將卡斯拿斯借畀佢，結果當然都係得啖笑。
中國同香港約戰巴拉圭國家隊踢熱身賽期間，兩地賽會都曾邀請拿莉莎到訪，但佢都「放飛機」，不過之後又去咗南韓徵婚揀老公，可見亞洲呢邊都有大量粉絲。
走紅以來，拿莉莎一直毫不吝嗇展露美好身段，早前幫成人雜誌巴西版《花花公子》拍攝一輯3D全裸寫真，結果打破銷量紀錄，由於尺度過分大膽，連佢老竇都忍唔住哦咗佢兩句。
拿莉莎憑藉驕人胸脯走紅，對於自己嘅上圍，佢話：「我嘅胸脯就如朋友一樣，我去到邊，佢就跟到邊！」