體壇Big 3賀聖誕 這一卡送給你

黃金寶平凡是福

To:屋企人

要成功就一定要付出，「單車天王」黃金寶能成為本地體壇Icon，佢嘅付出真係唔可以睇小！佢為咗訓練可以全年無休，於聖誕節同家人共享天倫食餐飯，都可以話係「天方夜譚」！不過，今年趁亞運結束，「阿寶」終能留港放咗一次「悠長假期」，唔單只可返屋企提前「做冬」，收到姨甥女親手送嚟一張聖誕卡，更鮮有體驗「正常人」生活，歡度平凡卻窩心嘅聖誕假期！

黃金寶「踩」車廿載，老早就習慣「無假期、無節日」生活，今次竟然可放足大半個月（除準備環南中曾赴深圳集訓一星期），堪稱「奇迹」！問「阿寶」罕見「長時間留港」，可有安排特別節目？性格內向嘅佢只係講：「冇咩特別。」實在「非常黃金寶」！

最緊要開心

阿寶解釋咁話：「香港人愛熱鬧，一向重視聖誕節，但我偏偏愛靜，尤其係過時過節更想一個人『靜靜哋』，走上街見到人流如鯽反而周身唔自在。」坦言已記唔起對上一次喺香港度聖誕係邊一年嘅「阿寶」又話：「能夠喺亞運奪一金一銀，絕對係最佳嘅聖誕禮物，至於願望嘛……最緊要開心！今年難得自己放假，家姐又由國外返港，早前全家人食飯『做冬』！好溫暖啊！」

From:阿寶

黃金寶

年齡：37歲

今屆亞運戰績：單車男子個人公路賽金牌、場地記分賽銀牌

傅家俊如期返港感恩

To:All my fans

「桌球天王」傅家俊差啲要喺英國希思路機場度過孤獨聖誕，好彩呢位「愛家大男孩」獲幸運之神眷顧，喺最後一刻順利登機，如期返港同家人、女友團聚，難怪佢都話今個聖誕難忘又有Luck！

早前唔少港人都因大風雪被迫滯留英國而無家可歸，就連Marco亦曾「打定輸數」，做好要喺倫敦孤獨過節嘅心理準備：「我最初想訂十八日機票，不過全部Full爆，所以改訂廿一日機位，點知就係原定十八、十九日起飛嘅航班悉數取消，都算『錯有錯着』了！其實，二十日倫敦嗰邊依然落雪，自己都擔心第二朝可否飛返嚟，隨時聖誕過後先可以離開；我甚至諗定一啲『煽情字句』寫上微博同朋友、fans訴苦呢！哈哈哈……好彩，最終都Confirm到機位，我真係好幸運，要感恩啊！」

香港夠熱鬧

逃過滯留一劫嘅Marco講笑咁話「返得切嚟」已係最好聖誕禮物，就算只係睇戲、食飯都好滿足：「喺英、港兩地歡度X'mas，各有各特色，一樣開心；論天氣、氣氛，英國『更加聖誕』，至於香港就成街人、夠熱鬧！」

From:Marco

傅家俊

年齡：32歲

今屆亞運戰績：桌球男子英式單打金牌

陳敬然有仔萬事足

To:囝囝

廿八歲嘅滑浪風帆金牌得主「阿英」陳敬然，一向都畀人「大細路」感覺，但估唔到喺「三大天王」入面，最早成家立室兼「添丁」嘅就係佢！去年聖誕開始「阿英」就已經告別獨行俠嘅生涯，今年更加成為「湊仔公」：「以前聖誕一條友就鍾意同班Friend去威，今年多咗BB之後就變晒，會帶佢去主題公園玩、返教會、同埋一家人去行商場，真係Warm好多！」陳敬然個囝囝陳靖Jacob已經一歲有多，仲開始識行路同埋叫「爸爸」，氹得「阿英」咁開心，乜都抵番晒啦！

阿仔改變人生

由「風帆型男」變「湊仔公」，陳敬然亦承認囝囝改變咗自己嘅人生：「依家咩事都會將Jacob放喺第一位，有乜嘢自己細個時做唔到，都好想囝囝可以擁有；就好似白色聖誕咁，我廿八年來都好想試吓但都無機會，但下年我就會『的起心肝』全家去旅行滑雪過聖誕！」連今年嘅聖誕願望，「阿英」都話想阿B佢快高長大，「廿四孝爸爸」真係當之無愧！

From:敬然爸爸

陳敬然

年齡：28歲

今屆亞運戰績：滑浪風帆米氏板金牌

圖、文：Maggie Wong、李芷韻、司徒子文