湖人熱火拉闊星期天！
NBA於香港時間周日早上「拆禮物日」上演重頭戲，兩大星級球隊湖人同熱火明早正面交鋒。熱火大戰當前，尋日作客先贏太陽95比83造勢，「大帝」勒邦占士狀態大勇，獨取36分，成為史上最年輕取得16000分、4000次助攻及4000個籃板嘅球員，唯一隱憂係「閃電俠」韋迪傷勢未明，未知能否趕及作客湖人上陣。
（now 635周日早上6時直播）
剛被小牛終止十二連勝紀錄嘅熱火，尋日作客太陽未有影響心情，雖然有韋迪因傷缺陣，但喺勒邦占士發威下，贏得相當輕鬆，「大帝」全場豪取36分、6個籃板球、4次助攻及3次偷波，令佢躋身萬六分俱樂部，並成為NBA史上最年輕取得「16000+4000+4000」超級數據嘅球員，現役球員之中，僅得高比仔、加納特、傑特及雷阿倫擁有此成績。
不過，熱火主將韋迪膝部受傷，仍未知能否趕及對湖人上陣，如果佢披甲嘅話，肯定令熱火勝算大增，因為佢曾經喺○四至○六年嘅聖誕節，帶領熱火擊敗湖人，而上季勒邦占士帶領嘅騎士亦贏過湖人。韋迪表示：「我傷勢唔嚴重，希望到時打到，但都要比賽當日檢查傷勢至可確定。」
抗拒聖誕期間比賽
球迷睇波開心，但係球員就唔係咁諗。勒邦占士同湖人教練「禪師」積遜都話已經厭倦咗聖誕期間比賽，唔知會唔會影響今場比賽嘅可觀性呢？
此外，月底生日嘅占士，已委託一間公關公司幫佢搞生日派對，除咗搵到商業贊助，仲會搵運動員、音樂家、模特兒、商界領袖同潮流達人參加，不過每位賓客都要畀一萬美元（約七萬八千港元）入場費，生日派對都咁識搵銀，真係抵你咁發！
NBA賽程
時間 賽事（前者主場） 讓分
周日1:00am 紐約人 Vs 公牛 公讓2.5分 now 678及有線165台直播
周日3:30am 魔術 Vs 塞爾特人 塞讓3.5分 now 635直播
周日6:00am 湖人 Vs 熱火 湖讓2.5分 now 635及中央5台直播
周日9:00am 雷霆 Vs 金塊 雷讓2.5分 now 678、有線62台、有線165台及中央5台直播
周日11:30am 勇士 Vs 拓荒者 拓讓4.5分 廣東體育直播
戰果放送
魔術 123 : 101 馬刺
帝王 79 : 84 公鹿
太陽 83 : 95 熱火
註：前者主場