其實國際足協自公布上屆世界盃由南非主辦開始，已經喺不同場合說明，要推動足球在全世界發展嘅理念，相對其他申辦國，俄羅斯及卡塔爾兩個國家都未辦過世盃，而卡塔爾更打正旗號係波斯灣首個世界盃。
至於俄羅斯係「金磚四國」之一，被視為未來二十年重要經濟體系，卡塔爾就一向都係富有國家，兩國亦大打經濟牌，俄羅斯畀持票人士免簽證入境，並於各主辦城市之間提供免費交通，而卡塔爾就會興建有冷氣嘅豪華球場，仲將球場用完送畀發展中國家。當然，BBC醜聞絕對係俄羅斯獲勝嘅一大原因，總唔會有人大方到畀人揭完瘡疤仲幫對方面上貼金啩？