大帝惡晒發火滅巫
近期遭受各方圍插嘅熱火，尋日總算成功止血，藉「三巨頭」合共攻入76分，主場以105比94輕取巫師，暫且紓緩了教練史普斯達少許壓力。被指在上場肩撞教練嘅「大帝」勒邦占士，就開腔表示事件純屬意外，並怒斥媒體故意炒作令事件化大。
戰績低迷嘅熱火，上場爆出「大帝」比賽期間肩撞教練史普斯達，令兩人不和傳言升溫，兩人今場賽前亦就事件會談了30分鐘。占士開腔指出，事件只係一次意外碰撞，佢之後都已經唔記得有過咁嘅事添，係傳媒瘋狂報道，佢先記番起。「大帝」仲話，今次出面解釋係唔想傳媒再炒作，佢希望球隊可以團結一致專心比賽。
小牛折箭六連勝
巫師缺少易建聯及約翰禾爾之下，令熱火今場打得非常輕鬆，賽事去到第四節初段，熱火已拉開20分領先優勢，只係尾段進入垃圾時間，先畀巫師追番唔少分數，但熱火最終都贏105比94。「三巨頭」今場合共攻入76分，其中以勒邦占士最佳，個人攻入30分、6個籃板及5次助攻，而韋迪及保殊則分別有26及20分進帳。同日賽事，小牛在「德州打吡」以101比91輕取火箭，常規賽連贏六場，狀態大勇。