李英健GT盃次名出賽未驚過
澳門大賽車今日邊位香港車手有機會「企櫈仔」？相信卅四歲的李英健「餐士」最大，他昨日在澳門GT盃排位賽取得第二名，排頭位係佢老對手日本車手澤圭太，由於GT盃成日出現塞車，當澤圭太畀人塞住，「孖池哥」就有爬頭機會。
GT盃共有卅四位車手參賽，經過排位賽僅得一架車被淘汰，不過餘下卅三位車手中，大都技術麻麻，令賽事成為澤圭太、李英健及屈斯三位超班車手之爭。
李英健表示，今屆GT盃的關鍵是太多慢車，特別係松山路段路窄車多，阻慢速度，許多快車手都受影響。對於今日戰術，「孖池」表示與澤圭太比併多年，今日決戰很視乎臨場發揮。至於慢車障礙的問題，當個別車手比頭車慢一圈，受阻的將會是排頭位出賽及領先的澤圭太，到時「孖池」就有機會。