歎茶剪髮換新Look Marco型爆爭獎牌
日前於英超聯勇闖4強、上周六返港的香港桌球「天王」傅家俊，昨日正式歸隊，急不及待與隊友飲茶聚一聚，兼進行輕鬆訓練。向來注重儀容的Marco昨早更專程走去「剪個靚髮」迎亞運：「睇番之前三屆啲相，個頭好厚！之前一直擔心自己個樣爭啲，所以想返嚟第一件事就去剪髮。剪完可以安心啲打波！」
這位卅二歲嘅「四朝元老」將再度出擊亞運十五紅球單打及英式團體賽，Marco指自己九八年參賽時的心情好緊張、○二年技術未成熟、○六年失落團體金牌是輸體力，而今屆心情卻最平靜：「輸贏都試過，現在心態好平靜同舒服。雖然仲係擔心體力，但呢幾日會保持充足睡眠，對自己同隊友陳國明、馮國威都有信心。」前兩個月一直在歐洲比賽的Marco又指密集式比賽對佢保持狀態好有幫助。
鍾意選手村生活
因開幕翌日要出戰而婉拒任港隊旗手的Marco，隨大軍於明日出發北上廣州。他說不想錯過開幕禮，如只能在螢幕上觀賞總係「爭咁啲」；Marco更透露自己喜歡住選手村：「因為平時比賽只會自己住酒店，冇乜氣氛！雖然我食齋，但也不太擔心膳食，三餐都會喺選手村解決。」至於問到會否效法隊友陳國明於亞運後結婚，Marco則表示暫時未想過這問題。