亞運仲未開幕，不過呢幾日啲足球賽事已經打得好激烈，香港隊摸和阿聯酋就睇到你血脈沸騰，血壓都高幾度，而南北韓大戰同中日大戰都係冤家聚頭，但係入到天河睇中日比賽，硬係覺得爭咁啲嘢，直至日本先入波一刻，即時想知呢球波係第幾分鐘入嘅呢？先至赫然發覺，成個球場竟然連計時器都冇個，查實都幾離譜，咁惟有自己睇錶啦！
記者室提供窩心小食
足球場不設大鐘計時，可能只係組委會一時疏忽，但其實組委會亦有可愛嘅一面，喺記者工作室，賽會安排幾樣小食，其中一項竟然係月餅，飲品方面就有涼茶，都係好有中國特色，令喺度工作嘅記者，有種特別窩心嘅感覺。