湖人四戰四勝！「紫金兵團」昨日以124比105大勝灰熊，連續四場得分過百，寫下球隊二十三年來最佳開局成績，今場焦點係加素兄弟內訌，加素獨取二十一分及十三個籃板，打到細佬馬克加素一戙都冇。
衞冕嘅湖人今季演出較上季更成熟，被譽為近十年來最強嘅一隊，但積遜教練卻利用激將法，話呢隊湖人及唔上九九至○○年嗰隊，賽前更故意批評加素，指佢打法唔夠細佬馬克加素硬淨，話後悔當年將細佬送走，「禪師」呢招果然奏效，加素尋日大發神威，盡顯大佬本色。
高比仔亦保持水準，上陣二十六分鐘取得二十三分，湖人今場手風極順，上半場已攻入七十三分，下半場大部分時間已成為垃圾時間。
此外，「最佳綠葉」奧當今場亦有好表現，交出十七分、八個籃板及六次助攻嘅全能成績，令佢成為NBA歷史上，第十快攞到萬一分、六千個籃板同三千次助攻嘅球員，與渣巴、張伯倫、大鳥布特、加納特等星級球員齊名。
至於明日直播波係公牛主場對紐約人，公牛主將戴歷羅斯弗爆，小前鋒鄧格上仗對拓荒者更獨取四十分，合二人之力足以擊敗對手！
（now 635周五早上8時直播）