湖人炒勇士高比返晒嚟！
衞冕總冠軍湖人繼續保持開咧強勢，尋日憑「孖寶」加素及高比拜仁合共攻入46分，加上奧當同費沙都有上佳演出，主場以107比83輕取勇士，開季三連勝！今場最值得「紫金兵團」高興係高比仔賽後向球迷大派定心丸，透露自己膝蓋已經100%復原，將會回復最佳狀態，輸波嘅勇士則有美籍華人球手林書豪搶得NBA首分。
兩軍賽前同為開咧2戰2勝，不過擁主場之利嘅湖人，開賽後隨即採取強攻，打完首節已領先34比14，拉開20分距離。湖人大幅領前後，往後時間都打得比較輕鬆，所以五員正選僅得加素打超過30分鐘，最終湖人就係靠首節嘅努力，以107比83大勝勇士。
林書豪ＮＢＡ生涯首得分
今場為湖人攞最多分嘅係中鋒加素，個人貢獻26分及12個籃板，至於高比仔就僅上陣27分鐘射入20分及搶下7個籃板。「禪師」積遜賽後指愛將高比仔仍未完全康復，但高比仔就唱反調：「信我啦，我隻腳已經100%復原，大家毋須再問我嘅傷患問題啦！」總算令湖人球迷舒一口氣。至於第二次為勇士以後備身份出場嘅林書豪，今場則攞到NBA生涯首分，佢出場16分鐘攻入2分，並有4次搶截及3次助攻。
本報綜合報道