大帝中咗魔咒？

熱火出師不利，因為「大帝」勒邦占士畀人落咗「魔咒」？今季組成「超級三巨頭」而被捧為奪標大熱嘅熱火，開鑼戰即出師不利，以80比88作客不敵有「舊三巨頭」坐鎮嘅「綠軍」塞爾特人。「大帝」今場雖有31分進帳，但亦做出多達8次失誤，佢贏唔到波同中咒有關？

「大帝」今夏離開騎士，所有克里夫蘭球迷都當正佢係仇人，克里夫蘭一家電台主持人日前就請咗個巫師，向呢個叛徒施咒語報復，據悉，呢個巫師已經用骨骼、血液同占士嘅球衣落咒！電台主持人更聲稱，今次施咒係要同占士清算。因為佢今次離隊實在極度過分喎。

講番昨日場波，熱火獲得占士及保殊雙雙來投，與韋迪組成令人憧憬嘅「超級三巨頭」，可惜打落又未如想像般震撼。傷愈復出嘅韋迪明顯不在狀態，16次起手僅得4中，而保殊同樣手感差，全日11射3中，兩人都不在狀態下，明顯未能減輕占士嘅負擔。「大帝」首披熱火6號球衣攻入31分，但8次失誤就成了今場污點。

相反，賽前被睇淡嘅塞爾特人，除「舊三巨頭」加納特、皮雅斯及雷阿倫皆發揮正常外，朗度亦有上佳演出，個人交出17次助攻，加上倒戈嘅奧尼爾亦幫到手，結果塞爾特人由頭帶到尾，以88比80擊敗熱火，打開今季勝利之門。

輸波嘅勒邦占士賽後就在個人微博表示，羅馬並非一天建成，所以新組嘅熱火仍需時間增添默契，希望球迷體諒。至於韋迪未對輸波失望，並表示今場只係82場常規賽嘅其中一場，毋須太過憂慮。不過，熱火當務之急必須正視默契問題，球隊今場就做出多達17次失誤，反映熱火默契不足，才會不斷犯錯。