即使瑞士球星費達拿今年被「西班牙野獸」拿度搶走網壇一哥位置，其戰績亦係2001年以來最差一季，但論賺錢能力，「費天王」仍以4,300萬美元（約3.35億港元）雄踞《福布斯》網壇首富，比2,100萬美元嘅拿度多出一倍，拿度甚至不及2,450萬美元嘅舒拉寶娃呢！
恭喜里奧費迪南就做第三任老竇！接近呢位曼聯後衞嘅消息人士透露，里奧太太莉碧嘉有咗三個月身己，兩公婆開心到飛起，因為佢哋一心想有個大家庭。里奧依家已經有兩個囝囝，四歲嘅Lorenz同兩歲嘅Tate，唔知佢哋係咪想追番個女呢？
韋斯咸後衞達哥斯達涉嫌非禮被捕！「錘仔幫」嘅葡萄牙球員達哥斯達日前相約朋友夜蒲，喺倫敦一間夜店飲大咗，跟住殺入舞池侵犯一名少女，據目擊者話，達哥斯達向個女仔上下其手，女受害人兩名朋友上前阻止，但畀佢襲擊，事件最終鬧上警局，達哥斯達暫時獲保釋候審。
利物浦作客拿玻里踢歐霸盃賽前，「紅軍」球迷同主隊球迷爆發多宗衝突，意大利傳媒報道，其中一宗兩批球迷喺酒吧大打出手，「紅軍」球迷更受到利刀襲擊。現場消息稱，最少三人包括兩名利物浦球迷送院，另一人為酒吧老闆，佢做「和事老」時亦受襲送院。