俗語有云：「虎父無犬子！」不過喺籃球世界裏面，能繼承星級父親衣鉢，同樣能在NBA闖出一番事業嘅球員實在唔多，就連「波神」米高佐敦之子謝費利，亦無法立足NBA。然而今季就有另一球星第二代殺入球壇，佢就係「大猩猩」伊榮之子「小伊榮」，呢位較老竇矮細嘅小前鋒，今季將會重返父親嘅母會紐約人効力，並會同「A米」史杜迪米亞合作攻堅。
同父親一樣出身自喬治城大學嘅「小伊榮」，其實早於○八年已參與NBA選秀會，當時亦有被帝王揀中，但隨即被交換至火箭。由於「大猩猩」伊榮係紐約人嘅永恒代表人物，所以後者好想簽入其子，希望有朝一日佢可領軍重拾昔日光輝，結果紐約人如願換得「小伊榮」，為紐約迷帶來一陣驚喜。
可惜二十出頭嘅「小伊榮」當時表現青嫩，三場季前賽僅攻入平均3.7分及取得1.7個籃板球，表現未如理想下終被球隊裁掉，並要落到發展聯盟中繼續其籃球事業。「小伊榮」其後透過父親過檔魔術參戰夏季聯賽，表現進步，到今個夏天再獲紐約人垂青，正式成為紐約人一員，磨練多年後終於有機會在NBA常規賽登場。
基於「小伊榮」從未有NBA常規賽經驗，故暫時未太受教練迪安東尼所重用，今季季前賽嘅上陣機會並唔算多，最長一次亦只係對塞爾特人時出場十餘分鐘。所以「小伊榮」現時首要目標係爭取更多上陣時間，幸好因為有父蔭，紐約人球迷特別愛戴「小伊榮」，佢每次出場均獲得全場歡呼，希望「小伊榮」可以把握今次機會，成功繼承「大猩猩」衣鉢啦！
年齡：26歲
國籍：美國
身高：6呎8吋
位置：小前鋒/大前鋒
球會：紐約人