亞運就快到，港足同組對手有阿聯酋、烏茲別克同孟加拉，賽制係廿四隊分成六組，爭入十六強，即係話其中四組嘅第三名都有出線機會，唔使問阿貴，港隊目標當然係要壓倒孟加拉，爭取第三名出線啦！
今次港足抽籤形勢唔差，實有賴上屆多哈亞運會港足嘅努力，當時港足喺已故嘅黎新祥帶領下輸畀伊朗，但總算和到印度同擊敗馬爾代夫，小組唔使包艇，今屆抽籤唔使落入最低檔次，呢啲就係叫做前人種樹後人乘涼嘞！
今屆亞運足球項目嘅暫定賽程，未開幕就要完成所有小組賽，港足喺下月七日先對阿聯酋、九日對烏茲別克，十一日火併孟加拉，前兩場肯定難打，港足就算輸，都千祈唔好咁大比數，目標係第三場擊敗孟加拉，希望爭取小組第三名成績出線。
波總今屆有晒準備，上星期拉隊去台灣踢龍騰盃四角賽，讓球員適應隔日比賽嘅頻密賽程，雖然對手實力唔強，但港足捧盃過程亦唔輕鬆，好彩係仲有時間去執吓隊波。近年大小港腳對孟加拉有三勝一負成績支持，可見港足贏面較高。港足去年勇奪東亞運金牌，全城振奮，今屆亞運喺廣州舉行，大家對港足有較高期望，雖然攞牌機會唔大，但至少要達到小組出線呢個基本目標，至叫做有交代。
通天波男