今次征戰亞運香港羽隊十二人大軍，總教練何一鳴形容係一個「新老組合」，參加過上屆亞運嘅選手只有女隊葉姵延、周凱華及男隊陳仁傑、王偉康，但其實他們全部都好年輕，其中混雙拍檔周凱華同王偉康仲好玩得，兩人靠「吵吵鬧鬧」增進默契，令隊內氣氛甚為熱鬧。
周凱華同王偉康都打過上屆亞運，兩人同為廿四歲，今屆首次組成混雙組合出擊，但他們未落場先「內訌」，昨日接受傳媒訪問期間，但見兩人不時鬥嘴互相取笑，王偉康解釋：「我哋唔係玩o架，因為咁樣可以加強默契！」
兩人透露羽隊一個小秘密，就係幾乎所有隊員都用同一品牌手機，令彼此溝通更方便，但周凱華仍唔放過取笑對方機會，指着王偉康說：「佢就係全隊最Out嗰個，依家仲用緊第一代『老爺機』，個個都用緊第三代甚至第四代啦！」
首次領軍參戰亞運的何一鳴表示，獎牌當然愈多愈好，但都要講運氣：「依家仲未抽籤，有乜對手都未知，所以好難預計，舉例若然『黑妹』成為女單種子，走線就會較有利，相反就會難打好多。」
港隊上月曾到日本集訓，與日本隊交手，稍後將到丹麥參賽，操好狀態迎接亞運。