【本報綜合報道】早前舉行嘅國際熱身賽，以巴塞隆拿球員為骨幹嘅西班牙以一比四慘敗畀阿根廷，之後到咗上輪西甲，巴塞喺主場又以○比二不敵升班球隊靴高斯，表現突然失準，原來同球員私生活有密切關係。
據阿根廷發行量最多嘅《號角報》披露，呢班世盃冠軍成員去到布宜諾斯艾利斯後，就光顧咗一間當地著名嘅夜總會。呢間夜總會係當地尋歡「性」地，內裏有各式各樣嘅色情服務提供。據一位阿根廷記者所述，西班牙球員狂歡之後連腳都抬唔起，佢甚至見到有球員帶埋酒樽入更衣室，精神狀態差到極點，自然踢唔出應有水準。