【本報綜合報道】史篤城領隊佩尼斯強忍喪母之痛，趕及喺前晚英超下半場歸隊指揮大局，令球員大為感動，眾志成城大踢爭氣波，克服逆境以二比一反勝阿士東維拉，打開今季聯賽勝利之門。佩尼斯嘅崇高專業精神，當今球壇少有，值得向佢致敬。
佩尼斯嘅媽媽於開賽前一小時逝世，佢見完慈母最後一面，就立即由威爾斯南部趕赴史篤城領軍，助教戴夫甘柏話：「我哋都以為佩尼斯會留喺屋企處理媽媽身後事，因為會方已公布佢缺陣嘅消息，但佢竟然喺半場休息時現身，將悲傷情緒放埋一邊，令人非常佩服，佢絕對稱得上係一位偉大領隊。」
史篤城上半場被維拉中場達寧攻破大門，但佩尼斯歸隊後令士氣大振，球員表現即時脫胎換骨，終於喺臨完場前十分鐘扭轉局勢，先由堅韋尼鍾斯頂入，再喺補時由賀夫奠定勝局，將勝利獻給佩尼斯亡母。
賽後，阿士東維拉看守領隊基雲麥當奴亦被佩尼斯感動：「我為佩尼斯媽媽過身感到難過，佩尼斯專業精神令人讚嘆。」史篤城經過開季三連敗，依家終於一嘗勝果，有助提升日後比賽信心。