【本報綜合報道】朗尼雖獲老婆麥露蓮原諒，但就要守行為，依家兩公婆會分房瞓；麥露蓮講到明只要死佬未來再越軌一次，佢就會手起刀落，即時斬情絲簽紙離婚，到時天王都冇面畀！
朗尼被爆召妓七個月，期間仲大玩三人性遊戲，婚姻一度處於破裂邊緣，但經朗尼老淚縱橫死纏爛打後，麥露蓮終於心軟原諒丈夫。前日二人前後腳返回價值四百萬嘅柴郡豪宅，大家面對面深情剖白，當晚兩人都再冇行出屋企半步，係自爆出召妓醜聞後，二人首次一齊過夜。
表面上雨過天青，但朗尼仍要守行為，據講麥露蓮唔肯與老公同房，相信呢個情況會持續一段日子。另外，麥露蓮講明今次係最後機會，他日若朗尼再次偷食，就會即時離婚，仲會帶埋Kai仔離開，朗尼以後都唔使旨意見佢哋兩仔乸。
另外，基於曼聯球員加利尼維利老退，已非球隊必然正選，故曼聯宣布將隊長臂章移交。其實近期紅魔隊長都係輪流做，比如尼曼查維迪、艾拉、朗尼及傑斯都做過。據聞領隊費格遜有意揀定一個隊長承繼人，而傷愈復出嘅里奧費迪南以及尼曼查維迪都係熱門人選。