【本報綜合報道】早前協助湖人蟬聯總冠軍嘅高比拜仁，終於完成膝蓋手術，雖然高比仔現時仍在休養，但湖人已確認佢可以趕及參與九月廿五日嘅訓練營。至於誓要離開黃蜂嘅CP3基斯保羅，原來心儀球隊並非紐約人，「蜂王」最想過檔嘅係魔術至真。
高比仔上季一直飽受膝蓋傷患困擾，在季後賽時期更要進行抽積水紓緩傷患，為解決膝蓋問題，高比仔就趁抖暑期間動手術。湖人發言人表示，今次手術相當成功，雖然已經係高比拜仁第三次嘅膝蓋手術，但預期唔會有任何後遺症，而高比仔第一次膝蓋手術在○三年進行，第二次就在○六年。現時高比拜仁正靜心休養，估計可以趕及出席九月廿五日嘅湖人季前訓練營。
另方面，被指想過檔紐約人嘅基斯保羅，據悉原來想去奧蘭多魔術至真，皆因魔術實力較紐約人強大，又有佢「夢八隊」友杜域侯活在陣，若然CP3能轉到魔術，絕對有能力抗衡熱火「三巨頭」。再者，魔術有較多具實力球員與黃蜂交易，較紐約人着數，所以魔術已積極尋求交易方案，希望盡快得到基斯保羅。