朴智星同金妍兒組「情侶檔」宣傳G20！南韓日前宣布任命兩大體壇巨星朴智星及金妍兒擔任11月於首爾舉行嘅G20峰會宣傳大使，由於早前有報道指星仔有意力追金妍兒，星仔今次大可假公濟私，攞正牌一親香澤。
今屆帶領南韓殺入世盃16強嘅朴智星和「花樣滑冰王后」金妍兒，都係南韓近年人氣巨星，負責今次G20高峰會議嘅有關組織表示，以兩人喺體壇上嘅傑出成就，擔任宣傳大使將可提高今次峰會嘅受關注程度。
早前有報道指朴智星有意追求金妍兒，可惜暫時襄王有心、神女無夢，而且兩人正值職業生涯最高峰時期，好難抽到時間拍拖，所以緋聞亦不了了之，不過今次G20高峰會議係國家大事，就算星仔因要歸隊參加曼聯季前集訓，未能出席今個月舉行嘅任命儀式，不過相信兩人日後亦有不少機會合作，星仔大可攞正牌溝女，大把機會將冰山劈開。
為解決全球經濟危機及穩定金融市場，二十個國家首腦每隔一段時間就會開一次G20高峰會議，上一次會議係喺上個月世界盃決賽周舉行期間在加拿大召開，當時英國首相卡梅倫同德國總理默克爾仲約埋一齊睇波添。
另外，今屆世界盃打入16強嘅「太極虎」南韓，已搵到新領隊人選，就係FC慶南教練趙廣來，佢將接替許丁茂擔任南韓統帥。
本報綜合報道