占士3.8億買超級豪宅

【本報綜合報道】勒邦占士新球季加盟熱火,話晒都係「大帝」,去到邁阿密當然繼續要「帝王式」享受,據美國傳媒《生活與時尚》報道,占士準備斥資4,950萬美元(約3.8億港元)購置超級豪宅,呢間豪宅最緊要有乜?當然係私家籃球場啦!

勒邦占士早前同熱火簽咗一份6年價值1.1億美元(約8.5億港元)嘅合約,賺到錢當然要獎勵自己啦,佢呢間新屋位於佛羅里達州東南部沿海地區,面積達20,088平方英尺,占士睇完之後覺得好鍾意,打算於日內「扑錘」。

私家場隨時玩兩手

據悉,呢間豪宅間間房都有落地玻璃對住個大海,此外仲有健身室、體育館、網球場、家庭影院等,即使勒邦占士放假期間手痕,都可以落球場玩番兩手。

豪宅嘅另一賣點,係有完善嘅閉路電視監察及安全系統,啱晒「大帝」呢類重視私隱嘅球星居住。上次「大帝」買屋之後,用咗兩年時間裝修,今次呢間豪宅已經有現成設備,睇怕好快入得伙啦!