勒邦占士早前同熱火簽咗一份６年價值1.1億美元（約8.5億港元）嘅合約，賺到錢當然要獎勵自己啦，佢呢間新屋位於佛羅里達州東南部沿海地區，面積達20,088平方英尺，占士睇完之後覺得好鍾意，打算於日內「扑錘」。
私家場隨時玩兩手
據悉，呢間豪宅間間房都有落地玻璃對住個大海，此外仲有健身室、體育館、網球場、家庭影院等，即使勒邦占士放假期間手痕，都可以落球場玩番兩手。
豪宅嘅另一賣點，係有完善嘅閉路電視監察及安全系統，啱晒「大帝」呢類重視私隱嘅球星居住。上次「大帝」買屋之後，用咗兩年時間裝修，今次呢間豪宅已經有現成設備，睇怕好快入得伙啦！