柏堅斯受傷缺陣益咗湖人

塞爾特人同湖人係ＮＢＡ史上奪標次數最多球隊，兩隊加埋包攬咗ＮＢＡ成立以來嘅一半錦標，翻查歷史，ＮＢＡ總決賽曾試過十六次要第七回合分勝負，結果其中十三次由主隊奪標。

洛城嚴防球迷鬧事

今日大戰預計會有數以萬名球迷喺餐廳、酒吧及廣場睇直播，上屆湖人擊敗魔術奪標後，出現縱火、破壞汽車等過激行為，警方共拘捕咗二十四名鬧事球迷，故洛城警方今屆嚴陣以待，於湖人主場球場外加派數百名警察巡邏，避免同樣事件再發生。而波士頓警方亦不敢怠慢，因為波士頓喺過往嘅慶祝活動曾經有三名球迷喪生。

此外，上仗對湖人受傷嘅塞爾特人中鋒柏堅斯，證實無緣喺今日上陣，柏堅斯右膝韌帶撕裂，昨日要揸住拐杖接受傳媒訪問。柏堅斯表示：「我隻腳好痛，郁都郁唔到，但嚟到決勝關頭，我會同隊友一齊，為佢哋打氣！」